Joriy yilning 8-iyun kuni Respublika Ma’naviyat va ma’rifat markazida “Ma’naviy-ma’rifiy ishlarni tizimli tashkil etishda “Ma’rifat” targ‘ibotchilar jamiyati a’zolarining o‘rni” mavzusidagi tadbir bo‘lib o‘tdi.

Tadbirni Respublika Ma’naviyat va ma’rifat markazi rahbari Hasanov Otabek Abdurashidovich kirish so‘zi bilan ochib, “Ma’rifat” targ‘ibotchilari faoliyati haqida hamda kelgusidagi rejalar xususida to‘xtaldi. Shuningdek, a’zolikka qabul qilinayotgan xodimlarni tabrikladi.

– Muayyan bir jamiyatning siyosiy-ijtimoiy barqarorligi va taraqqiyoti koʻpgina obyektiv omillar qatorida, iqtisodiy va maʼnaviy jarayonlarning qanchalik uygʻun tarzda olib borilishiga bevosita bogʻliq, deydi – Iqtisodiyot va moliya vaziri o‘rinbosari Gulnora Raximova. –  Prezidentimiz taʼbiri bilan aytganda, “Agar jamiyatning tanasi iqtisodiyot boʻlsa, uning ruhi va joni maʼnaviyatdir”. Bugun vazirligimiz bilan Respublika Maʼnaviyat va maʼrifat markazi hamkorlikda samarali faoliyat yuritib kelmoqda. Birgina 2023-yilda 100 nafar vazirlik tizimi xodimlari Ijtimoiy-maʼnaviy tadqiqotlar institutida malaka oshirdi.

Vazirligimizda Maʼnaviy-maʼrifiy galereya ham tashkil etilgan bo‘lib, undan oʻzbek milliy cholgʻu asboblari, I va II Renessans hamda milliy uygʻonish vakillari, zamonaviy adabiyotimizning yorqin namoyandalari va ularning xalqimiz oldidagi buyuk xizmatlari haqida hamda boshqa qiziqarli maʼlumotlar oʻrin olgan.

Tasdiqlagan “Yoʻl xaritasi”ga asosan, xalq bilan muomala madaniyatida rahbar maʼnaviyati, ogʻzaki nutq, muloqot mahoratini oshirishga qaratilgan “Notiqlik sanʼati” boʻyicha oʻquv kursida 30 nafar rahbar xodim malaka oshirdi.

Tadbirda “Maʼrifat” targʻibotchilari jamiyati aʼzoligiga munosib koʻrilgan Iqtisodiyot va moliya vazirligining 30 nafar xodimi qabul qilindi. Xodimlarga a’zolik guvohnomlari tantanali topshirildi.